LEGAZPI CITY-Na-stranded na 21 na mga opisyales kan gobierno sa Israel ligtas na nakabalyo pasiring sa Jordan sa tahaw kan nagkukusog na tensyon, segun sa Department of Foreign Affairs (DFA).
Sa nasabing numero, 17 an nag-atendir nin sarong agricultural technology training puon Hunyo 10 hasta Hunyo 20. Kabali digdi an duwang kongresista, siyam na alkalde, apat na bise alkalde, asin duwang regional director. Kabali man an apat na espesyalista hale sa Department of Agriculture.
Segun sa Department of Foreign Affairs (DFA), aktibong nakipagkoordinar an Philippine Embassy sa Tel Aviv sa Philippine Embassy sa Jordan asin mga nanonongdan na awtoridad para mapadali an ligtas na pagbalyo kan grupo.
Sinabat sinda ni Philippine Ambassador Wilfredo Santos sa King Hussein Border kung sain tinawan sinda nin ayuda, kaiba na an transit visa na warang bayad hale sa gobyerno.
Piglalaoman kan Department of Foreign Affairs (DFA) na sa mga masunod na aldaw na mareresibe man kan embahada sa Jordan an enot na grupo nin mga overseas Filipino workers bilang parte kan evacuation efforts.
Mientrastanto, sa intrevista kan Philippine Ambassador sa Israel na si Aileen Mendiola-Rau, pighayag kaini na mabyahe pa Dubai an grupo antes magbyahe pabalik sa Manila.
Nagpapadagos an pagbalyo nin mga opensiba sa pag-ultanan kan Israel asin Iran na nagbubugtak sa mga sibilyan asin mga dayuhan sa sona nin iriwal sa peligro.
