LEGAZPI CITY—Piglalaomang padagos na makawsa nin mga pag-uuran sa rehiyong Bicol an pigbabantayang Low Pressure Area (LPA) sa nacion.
Segun ki State Weather Bureau Weather forecaster Jaime Bordales, sa intrevista kan Bombo Radyo Legazpi, sa presente, hibaba man giraray an tsansa kaining magin bagyo sa masunod na 24 oras, alagad, dae man liwat pighahali kan saindang ahensya an posibilidad na mag-intensify ini bilang sarong ganap na bagyo sa mga masunod na aldaw.
Dugang kan opisyal na an duwang weather system—low pressure area asin habagat an makakaapektar sa Kabikolan kun saen magdadara ini mapanganuron na kalangitan asin tsansa nin mga kalat-kalat na pag-uuran, pagkikilat asin pagdagoldol.
Piglalaomang maeeksperyensyahan an nasabing kamugtakan kan panahon sa rehiyon sa masunod na duwa o tulong aldaw.
Alagad, pag-abot man suboot kan weekend pwedesir na makaeksperyensya nin maray na panahon an Bicol huli na man sa pagrayo kan low pressure area.
Afuera digdi, huli man sa presensya kan low pressure area, magigin mahukol an kadagatan sa kanlurang parte kan Southern Luzon asin Visayas.
Mantang padagos man na makakaapektar sa dakulang parte kan nacion an southwest monsoon o habagat partikular na sa parte kan Southern Luzon, Visayas, asin Mindanao.
Mientrastanto, pagiromdom man ni Bordales sa mga parasisira na ibitaran muna an paglayag sa kadagatan huli na man sa makukusog na hukol na dara kan raot nin panahon.
