LEGAZPI CITY – Nakapreparar na an mga kapulisan mapadapit sa huma kan pigbabantayang Low Pressure Area asin kan habagat na parehong nakaka-apektar na sa pirang parte kan kabikolan.
Segun ki Police Regional Office 5 Regional Director Police Brigadier General Andre Dizon sa intrevista kan Bombo Radyo Legazpi na pig-olayan na ninda an possible deployment kan saindang mga personel nganing tulos na makaresponde an mga ini enkaso magkaigwa nang insidente nin mahiwasang pagbaha asin pagrasay nin daga.
Tatawan man ninda nin prayoridad an mga lugar na komon asin dati nang naka-eksperyensya nin mga pagbabaha nganing dae na mautro suboot an pagkakaigwa nin mga na-stranded sa saindang mga kaharongan.
Eenoton ninda an pagdeploy sa mga provincia kan Catanduanes asin Camarines Sur huli ta ini suboot an mga labing nadistroso kan mangrapado si bagyong Kristine asin bagyong pepito kan nakaaging taon.
Pigtaram pa kan opisyal na nakahanda man an mga bagong emergency equipment kan mga kapulisan nganing tulos na magamit sa oras kan emerhensya.
Nakastandby na man suboot an 7 mga darakulang truck kan kapulisan nganing maghatod asin magsundo nin pasaherong na-stranded huli sa mga pagbaha.
Padagos man an saindang koordinasyon sa disaster risk reduction management team kan kada Local Government Unit siring man an saindang counterpart sa fuersa armadas kan nacion nganing mas marikas an pagtatao ninda nin tabang sa oras nin kalamidad.
