LEGAZPI CITY – Gadan an tulong katawo makalihis an nangyaring banggaan sa pagultangan kan motorsiklo asin pampasaherong bus sa kahalabaan kan Maharlika Highway na sakop kan Barangay Laboy, Matnog, Sorsogon.
Segun ki Matnog Municipal Police Station Officer in Charge Police Lieutenant Colonel Ruel Pedro sa intrevista kan Bombo Radyo Legazpi na paluwas sa sarong gasolinahan asin mabalyo sa tinampo an sarong motorsiklong pigmamaneho kan 41-anyos na lalaki, sakay an sarong 2 anyos na joven asin sarong 17-anyos na babae kan bigla ining mabangga kan nakasabatan na pampasaherong bus.
Huli sa tindi suboot kan banggaan tuminalyap an mga sakay kan motorsiklo kun sain dead on the spot an drayber kaini mantang pigporbaran pang isugod sa ospital an duwang backride alagad idineklarang dead on arrival an 2 anyos na joven asin binawian man nin buhay an 17 anyos na babae makalihis an pirang oras.
Biglang liko suboot an lokasyon kan gasolinahan kun kaya pwedesir na nagka-bulagaan an parehong mga driver kun kaya dae na nakaporbar pa na ilihis an saindang mga behikulo.
Pigtaram pa kan opisyal na sa isinagibo nindang simulation exercise sa pinangyarihan kan aksidente, nadiskubre ninda na aabuton talaga an anomang behikulo na nagluluwas sa biglaang liko kan nasabing tinampo urog na kun marikas an pagpapadalagan kaini.
Basado man sa saindang imbestigasyon, ini na an ikaduwang beses na may nangyaring banggaan asin parehong hale sa nasabing gasoline station.
Sa presente, na-inquest na an driver kan bus asin mahahampang sa kasong reckless imprudence resulting to multiple homicide and damage to property.
Pagirumdom ni Police Lieutenant Colonel Pedro sa publiko na i-obserbar an road safety procedures nganing malikayan an siring kaining insidente.
