Pighagad kan Commission on Human Rights (CHR) sa gobierno an hararomang imbestigasyon sa suboot mga pagbalgar sa press freedom sa katahawan kan election period.
Inihalimbawa kan komisyon an mga naresibi kaining report sa ‘Alisto! Alert’ quick response system kun saen nagkapirang media worker an suboot nakaeksperyensya nin pananakot mantang piggigibo ninda an saindang tranaho.
An iba, susog sa CHR, an pinagbawalan na maglaog sa mga polling precinct mismong aldaw kan eleksyon.
Pagdoon kan komisyon, nakakahandal an mga nasabing insidente huli ta ini an hayagang pagbalgar sa press freedom asin sa karapatan kan publiko na maka-access nin napapanahon asin tamang impormasyon.
Paliwanag pa kan komisyon na importante an papel kan media huli ta pigbabantayan kaini an pagiging bukas kan eleksyon kaiba na an accountability sa bilog na electoral process.
Mandato kan mga otoridad, segun sa komisyon, na bantayan asin protehiran an karapatan kan mga mamamahayag sa bilog na nacion.
Enot nang sinabi kan Presidential Task Force on Media Security na iniimbestgaran kaini an mga naresibing reklamong hayagang pagbalgar sa karapatan kan mga media worker sa kasagsagan kan election period, lalo na sa mismong aldaw kan eleksyon.
