Nagpagiromdom an Department of Labor and Employment (DOLE) sa mga employer sa tamang pasweldo sa midterm elections sa Lunes, Mayo 12 na idineklara bilang special non-working holiday.
Susog sa ahensya, an mga empleyadong malaog sa Lunes an kwalipikadong makaresibi nin full pay asin kadugangang 30% kan basic wage.
Ini alinsunod sa Presidential Proclamation No. 878 na pinirmahan ni Presidente Ferdinand Marcos Jr.
An mga empleyado man na dae malaog sa trabaho sa Mayo 12 an subject sa “no work, no pay” principle afuera na sana kun igwang company policy, practice o collective bargaining agreement.
Para man sa empleyadong nagtrabaho nin lagpas sa walong oras o nag-overtime sa eleksyon, makakaresibi nin kadugangang 30% kan saindang orasang sahod.
An mga nagtrabaho na nagkataong rest day an kwalipikadong makakaresibi nin kadugangang 50% kan saindang basic wage para sa enot na walong oras.
Kun nagtrabaho sa rest day na lagpas man sa walong oras, dapat mabayadan nin kadugangang 30% nin orasang sahod para sa sobrang oras.
