LEGAZPI CITY—Nagkundusir na an Bureau of Fire Protection Albay nin fire safety inspection sa mga polling precinct siring kan mga eskwelahan asin malls na gagamiton para sa maabot na eleksyon sa Mayo 12.
Segun ki Bureau of Fire Protection Albay Provincial Fire Marshall Fire Superintendent Jerickson Miraflor, sa intrevista kan Bombo Radyo Legazpi, nakapagrehistro an saindang opisina nin nagkapirang eskwelahan na delikado sa kasulo huli ta dae an mga ini makapagkomple sa mga fire safety requirements na ipigpaotob kan ahensya.
Afuera sa inspeksyon sa mga polling precinct, nagsagibo man sinda nin safety inspection sa mga pasilidad kan Commission on Elections (COMELEC) na pigbubugtakan kan mga election paraphernalia asin iba pang gamit kan ahensya.
Ipigsagibo an nasabing lakdang nganing masierto na dae magkaigwa nin problema durante kan eleksyon na may kinaaraman sa kasulo.
Dugang kan opisyal na nagkundusir man sinda nin deployment plan kun saen idedesignar an saindang personahes sa mga strategic area na harani sa polling precincts magin sa urban areas.
Mientrastanto, nakatalaan man isagibo ngunyan na Huwebes, Mayo 8, an sarong send-off ceremony kan saindang personahes na maserbi sa pirilian.
