LEGAZPI CITY – Maugmang inanunsyar kan Commision on Elections na nagpapadagos an provincia sa pagigin salbado sa huma nin kariribukan pirang aldaw antes an 2025 Midterm Election.
Segun ki COMELEC Albay Election supervisor Atty. Ma. Aurea Bo-Bonao sa intrevista kan Bombo Radyo Legazpi na naisakatuparan ini sa pagtatarabangan kan komisyon, media, kandidato, botante asin kapulisan nganing magin matuninong asin salbado an pirilian.
Na-neutralized na man kan komisyon asin kan kapulisan an huma kan Concepcion criminal gang kun kaya nahali sa red category an banwaan kan Libon, Albay.
Nakatalaan man sindang makipag-olay sa mga manlain-laing law enforcement agency nganing mailatag na an security details sa nagdadangadang na pirilian.
Pigtaram pa kan opisyal na isipon man dapat kan mga botante na sinda an boss huli ta sinda an ma-elihir kan mga masunod na magigin mga lider kan provincia.
Dae man dapat magpadara an mga bikolano sa mga pig-aapod na “paipit” suboot kan mga kandidato huli ta tulong taon masapar an sarong tawo kun sala an kandidato na saiyang binoto.
Pagirumdom ni Atty. Bo-Bonao sa mga kandidato na ipahiling sana kan mga ini sa mga botante na karapat-dapat sindang botohon huli ta nagsusunod sinda sa mga ley asin regulasyon na ipigbugtak kan komisyon.
