Pigkukuwestiyon ni Bise Presidente Sara Duterte an numero kan 30,000 na suboot nagadan sa kampanya kontra droga na inilansar ni dating Presidente Rodrigo Duterte.
Pigtawan doon man niya na kaipuhan nin matibay na patunay o ebidensiya na nagsusuporta sa naunambitang numero kan mga nagadan huli ta nagtetenir na bako kumbinsido an opisyal sa nasambitang mga alegasyon asin pighahagad an konkretong datos nganing mapatunayan an pigsasabing 30,000 death toll.
Segun kay VP Sara, sa presente an 181 na ebidensiya pa sana an naitatao asin naisusumiter kan prosekusyon sa International Criminal Court (ICC) katakod kan mga kaso kan suboot paggadan sa drug war kun saen an ipiggiit niyang harayo an numero na ini sa suboot rinibong numero kan mga nagadan na pigtatakod sa kampanya.
Dugang pa kan bise na pano mapapatunayan suboot an pigtataram na 30,000 na biktima kan drug war kun wara mang naipapahiling na kumpletong listahan kan mga pangaran kan mga nagadan asin kun saen nakabase an numero na ini.
Pigtawan doon man niya na sa presente an dae pa suboot uminabot sa 50 an numero kan mga naberipika o namidbid na mga biktima.
Sa nasambitang numero, 43 pa sana suboot an kumpirmadong biktima na katampad man nin 43 counts of murder na siya suboot na harayo pa man sa pigsasabi sa mga report na 30,000 indibidwal na nagadan sa irarom kan administrayson.
Sa presente, si dating Presidente Rodrigo Duterte an nahahampang sa kasong crime against humanity sa International Criminal Court (ICC) katakod kan saiyang kampanya kontra droga.
Padagos man na nagkukuwa pa nin impormasyon an ICC nganing pormal na imbestigaran asin litisin an dating presidente kan pilipinas katakod kan suboot pagbayolar sa direchos humanos.
