LEGAZPI CITY—Matrayumpong ikinundusir kan Masbate Police Provincial Office kairiba an Commission on Elections (COMELEC), Philippine National Police (PNP), Philippine Army, asin mga lokal na gobierno an ginibong Unity Walk, Interfaith and Peace Rally, and Peace Covenant Signing sa provincia kan Masbate.
Ini bilang pagpepreparar sa napaparaning national and local elections sa Mayo 2025.
Segun ki Masbate PPO PIO PCPT Estrella Torres, sa intrevista kan Bombo Radyo Legazpi, pinartisiparan ini kan mga haralangkaw na opisyal gikan sa manlaen-laen na ahensya asin ginatos na mga indibidwal asin iba pang stakeholders.
Nagkaigwa man nin covenant signing kun saen nagpirma an mga kandidato sa lugar bilang patunay kan saindang dedikasyon sa sarong honesto, maayos asin warang karahasan na eleksyon.
Bago an covenant signing nagkaigwa man nin unity walk kairiba an mga nasabing haralangkaw na opisyal asin mga kandidato sa provincia.
Segun sa opisyal na importante an ginibong aktibidad huli ta nagpapahiling ini kan commitment, suporta asin kooperasyon kan mga lokal na gobierno para sa sarong matoninong na eleksyon.
Mientrastanto, nagpagiromdom man ini sa publiko na magin mapagmatiyag sa karahasan na may kinaaraman sa eleksyon ngani na magresulta sa sarong matoninong asin maayos na pirilian sa Mayo 2025.
