Pwedesir umapela nin bayad-danyos hale sa International Criminal Court (ICC) an mga biktima nin extra-judicial killings kan panahon kan madugong war on drugs .
Segun kay ICC-accredited lawyer Atty. Joel Butuyan, igwang pig-aapod na “reparation stage” para sa mga biktima sa oras na naabot na an conviction kun saen pwedesir ipresenta kan mga biktima an mga ebidensiya sa danyos na saindang na-eksperyensya.
Ipinaliwanag ni Atty. Butuyan na kukuwaon an itatao na bayad-pinsala hale sa recoverable assets kan akusado asin igwa man suboot na remedyo para sa pag-freeze sa mga ari-arian kan akusado mantang nagpapadagos an paglilitis.
Pwedesir suboot na magsunad an mga EJK victims para sa pag-freeze kan assets ni dating Presidente Rodrigo Duterte pagkatapos kan kumpirmasyon kan saiyang mga kaso na itinakda sa Setyembre 23 asin bako pa ngonian huli ta dae pa kumpirmado an mga kaso laban sa dating Presidente.
Enkaso wara mang marekober na assets hale sa akusado, igwang trust funds an ICC para sa reparations.
Alagad, dae suboot paglaoman na dakula an kantidad na mareresibi huli ta an posibleng itao na bayad-danyos iyo an pangkabuhayang negosyo o aktibidad asin bako sana limitado sa monetary damages.
Afuera digdi, pwedesir mang magtao an international tribunal nin psychological support asin iba pang assistance nganing matabangan an mga apektadong pamilya na makabuwat giraray sa saindang buhay kasunod kan mga krimeng nagibo sa sainda.
.){kind=link}