LEGAZPI CITY—Pighayag kan sarong political analyst na posibleng dakol an magigin epekto sa pagkakaarestar kan International Criminal Court ki dating Presidente Rodrigo Duterte.
Segun ki La Salle-Department of Political Science and Development Studies Political Analyst Matt Ordoñez, sa intrevista kan Bombo Radyo Legazpi, na posibleng dakol an mangyari maski na ini na-acquit, mapatunayan na innocent and not guilty, o matawan nin guilty verdict an dating Presidente.
Sinabi ni Ordoñez na mas makusog an anti-international sentiments asin anti-institutional sentiments kan mga suportadores ni Duterte, na buot-sabihon mas lalo na dae mauyon an mga nagkapirang namamanwaan sa international organizations siring kan United Nations, International Criminal Courts, Interpols, asin iba pa.
Delikado suboot na mangyari ini huli ta kaipuhan man giraray kan nacion an tabang kan international organizations sa pag-imbestigar sa international crimes, piracy, smuggling, magin kan terorismo huli ta ini an piggamit kan gobierno sa paglaban sa mga krimen.
Alagad depende man suboot kun lehitimo an proceedings huli ta kun dae magsunod an tamang procedures o kulang an ebidensya na matawan ini nin guilty verdict an buot-sabihon na mahihiling ini kan mga namamanwaan bilang sarong political prosecution.
Ini maresulta na mas magkusog an boses kan mga suportadores na kontra sa political prosecution asin posibleng magresulta sa paghibaba kan approval ratings ni Presidente Bongbong Marcos.
Dugang kaini na an pagkakaarestar kan dating Presidente an maresulta sa pagkakaigwa nin mas dakulang protesta, pagtiripon, asin posibleng mas madakol suboot an mga iwal.
Tinawan-duon man ni Ordoñez na importante na pag-isipan an buot-sabihon kan “crimes against humanity” huli ta kun dae ini mangyari an baka isipon kan mga namamanwaan na basta Presidente pwedesir nang maggibo nin giyera, manggadan nin mga persona na warang limitasyon.
Dapat man na kasabay an pagpaotob nin rule of law sa paggamit kan kapangyarihan kan gobierno.
Importante man an kaluluwasan kan trial ni Duterte na maski ini halaba dapat tama an proseso o procedures nganing mahiling na naggagana an ley—internasyunal man ini o lokal.
