LEGAZPI CITY – Nakumpiska kan mga kapulisan sa sarong lalaki an mga drum na may laog na mga ilegal na produktong petrolyo sa kadagatang sakop kan Barangay Sorosimbajan, Esperanza, Masbate.
Segun ki Esperanza Municipal Police Station Chief of Police, Police Captain Saldy Maestre sa intrevista kan Bombo Radyo Legazpi na binisto an suspetsado na si alyas “Leon”, 44 anyos, asin residente kan naunambitang barangay.
May nagsumbong suboot saindang mga concern citezen mapadapit sa nasambitang produkto na ibabagsak sa lugar kan suspetsado.
Tulos nindang dinumanan an lugar asin naabotan kan saindang team an suspek asin an manlain-laing klase kan produktong petrolyo na kagsadiri kaini.
Pigtaram pa kan opisyal na susog sa salaysay ni alyas “Leon”, itinakas niya an mga produkto sa Samar asin mawot niya ining ipabakal kuta sa Masbate sa mas baratong kantidad.
Nakompiska ninda an 35 drum kan produktong petrolyo kun sain 25 sa mga ini iyo an gasolina asin 10 drum man an krudo mantang nagkakantidad nin poco mas o menos P400,000.
Sa presente, na-inquest na an suspetsado sa prosecutors office asin tinawan ini nin 10 aldaw nganing magsumite kan saiyang counter affidavit.
Nagpasalamat ini sa mga concerned citizen huli ta sinda an nagtataong impormasyon sa mga kapulisan nganing masawata an mga siring kaining gawi asin nganing mamantenir an katuninongan kan saindang banwaan.
