LEGAZPI CITY- Padagos an paglaban kan provincia kan Albay kontra sa paglakop kan helang na rabies na nakaka apektar sa mga namamanwaan.
Segun ki Albay Provincial Veterinarian Dr. Pancho Mella sa intrevista kan Bombo Radyo Legazpi na an tunay na laban kontra sa rabies an nakasalalay sa kamot kan mga barangay.
Paliwanag kan opisyal na kinakaipuhan na maaraman kan mga lokal na opisyal an saindang responsibilidad ngani na maibitaran an anuman na kaso kan rabies.
Tinawan duon man kaini an responsibilidad kan mga pet owners na pagbabantay sa saindang mga ataman.
Segun ki Mella na kun dae man kayang mag-ataman nin dakol, dae pagpabayaan na magdakol an populasyon kan saindang mga ataman.
Dugang pa kan opisyal na igwang libreng kapon na pigtatangro an ahensya siring man an anti-rabies vaccination urog na ngunyan na paparani na naman an summer season.
Hagad man kaini na dae maapektaran kan election spending ban an saindang ikokundusir na mass vaccination sa mga ataman na hayop.
