LEGAZPI CITY- Papaulion na puon sa agang hapon hasta sa aldaw nin Sabado an gabos na Mayon evacuees kan banwaan kan Sto. Domingo makalihis na ibaba sa Alert Level 3 status ang bulkan.
Sa intrevista kan Bombo Radyo Legazpi ki Sto. Domingo Municipal Disaster Risk Reduction and Management Officer Engr. Ed Balidoy, nag-iimpake na an mga evacuees mantang naghahalat pa kan pormal na abiso sa pagpapauli kan mga ini.
Nakikisumaro man an nasabing lokal na gobierno sa pagbusol kan malinig na evacuation center na babayaan kun kaya dagos-dagos na an paglimpia kan mga residente sa irarom kan ipigpapaotob na cash for work program.
Kabilugang 2,900 na pamilya o 11, 200 na indibidwal an papaulion na sa Barangay Lidong, San Isidro, Fidel Surtida, Sta. Misericordia asin San Fernando.
Inasegurar man kan opisyal na tatawanan nin mga ‘pabalon’ na relief goods an mga ini mientras na en kaso igwa pang mag-abot na mga supplies, ibabariwas na sana an mga ini sa mismong barangay.
Nagpromesa naman suboot an Office of the Civil Defense (OCD) Bicol na maghahatod kan pami-pamilya pauli sa kaniya-kaniyang residencia sa tabang kan Task Force Sagip para sa Mayon.
