LEGAZPI CITY- Apektado an klase makalihis na paramientras na isarado an rinibong eskwelahan sa United Kingdom mantang kinanselar man an nagkapirang biyahe kan tren asin eroplano huli sa ikatulong aldaw kan matinding bagsak kan niyebe o snow katakod kan Storm Emma.
Sa intrevista kan Bombo Radyo Legazpi ki Pinay singer Shaniah Rollo na presenteng nasa Dublin, Ireland, nagtetenir suboot sinda ngonian sa harong katakod naman kan abiso kan mga otoridad na dae na munang magbiyahe.
Naobserbaran man suboot an halabang linya kan namakal sa mga grocery stores kasuodma na garing nag-panic buying makalihis na mag-anunsyo an kadaklan sa mga tindahan kan paramientras na pagsasarado.
Pighahandaan pa sa nagkapirang parte kan UK an hasta 50cm na bagsak kan snow na posibleng darahon kan Storm Emma na pig-aapod man na “the Beast from the East”.
Npag-araman na dakol man na driver an na-stranded sa freezing temperatures mantang nairehistro na an casualty sa pagkagadan kan sarong 7-anyos na aking babaye sa car crash sa Cornwall, 46-anyos na lalaki sa banggaan sa pano nin yelong agihan sa Berkshire asin nadiskubreng malipot nang bangkay kan sarong 75-anyos na babaye sa Leeds.
Nag-isyu naman nin red weather warning sa snow sa south-west England asin south Wales bunsod kan nasabing raot kan panahon.
