LEGAZPI CITY- Nangapudan an Masbate Advocates for Peace sa mahigot na pagbabantay asin hirarom na imbestigasyon katakod kan haros magkakasunod na insidente nin pambabadil na nairehistro sa nasambitan na probinsya.
Sa ekslusibong intrevista kan Bombo Radyo Legazpi ki Judge Igmidio Camposano kan nasambitan na grupo, nakakaalarma na suboot an mga insidente kaya pighagad kaini an pag-convene kan provincial peace and order council ngani na siertuhon an isasagibong lakdang para digdi.
Dugang pa kaini na maribok na an general situation sa nasyon na dae na dapat pang dugangan kan masbate urog pang pigmamawot man na ibusol an turismo asin ekonomiya sa lugar.
Pighihiling man ni Judge Camposano na posibleng igwang koneksyon an mga ini sa naoctabang barangay asin Sangguniang Kabataan elections kun sain komon na suboot an mga siring na insidente antes asin makalihis an pirilian.
Hagad pa kaini sa PNP na ipagpadagos an security measures asin an paghihigot sa mga badil asin armed groups sa ibong kan pagsuspendi election period ngani na mapugulan an anuman na kairibukan.