LEGAZPI CITY – Pinaglalamayan na ngunyan an sarong tricycle driver makalihis na bawian nin buhay kan pagtitigbason kan duwang dae pa nabibistong kalalakihan sa probinsya kan Masbate.
Nabisto an biktima na si Daryl Mitra, 22-anyos asin residente kan Barangay Balocawe sa nasambitan na probinsya.
Enot kaini, ipinaabot sa mga otoridad an impormasyon kan sarong Roder Mitra dapit sa paninigbas sa saiyang aki kun kaya tulos na nagresponde an mga personahes kan Dimasalang Municipal Police sa pangengenot ni PO3 Judy Villamor ngani na magkondusir nin imbestigasyon.
Napag-araman na nakikipag-inuman an biktima sa harong kan mag-agom na Marina Ecita asin Elmo Ecita kaibanan an sarong Mariano Ecita asin makalihis ini, hinatod pa kan mag-agom an biktima sa gate asin nag-uli na ini.
Makalihis ini, nabigla na sana suboot si Roder Mitra kan madangog niya an biktima na naghahagad nin tabang kan tigbason ini asi nahiling an duwang suspek na tulos man na nagdulag sa kabubuldan na parte kan lugar.
Nagsapar an biktima nin tama sa saiyang luong asin abaga na nagresulta sa tulos kaining kagadanan.
Mientrastanto, narekober sa pinangyarihan kan insidente an ginamit na patarom asin nagpapadagos pa ngunyan an ipigkokundusir na imbestigasyon kan Dimasalang MPS para sa posibleng pagkakabisto asin pagkaka arestar sa mga suspek.
