LEGAZPI CITY – Magkokundusir nin sarong forum an Environmental Management Bureau (EMB) katakod kan selebrasyon kan Philippine Water Week na mapuon sa Marso 19 hasta 25.
An Water Polution Prevention Forum na papangenotan kan ahensya an ikokundusir sa Marso 24 kun sain pag-oolayan an mapadapit sa pag-aataman kan tubig.
Sa intrevista kan Bombo Radyo Legazpi ki Jaycent Dacuyan, tagapagtaram kan EMB, pighayag kaini na papartisiparan an aktibidad kan mga representantes hali sa mga Local Government Units kan Albay asin Camarines Sur kaibanan an mga partner industries kan ahensya.
Tutukaron suboot digdi kun papano mapapangatamanan asin mapapakinabangan an water waste urog na ngunyan na nagkakaproblema na sa potable water.
Dugang pa ni Dacuyan na pighihiling man an posibilidad na mapag-adalan an proseso na pigigibo sa nasyon kan Singapore na kun sain an maatoing tubig an nag-aagi sa proseso ngani na magamit na pangkonsumo kan mga namamanwa.
Apwera digdi, tutukarom man suboot an mga regulasyon sa paggamit nin tubig sa gabos na mga establishimento sa probinsya kan Albay.
