LEGAZPI CITY- Puga-puga na an preparasyon kan provincia kan Albay katakod kan pinag-aantisiparan na epekto kan super El Niño, na enot na pinatanid kan state weather bureau na posibleng magdurar hasta sa ika-duwang parte kan 2027.
Segun ki Albay Provincial Agriculturist Daryl John Buenconsejo sa intrevista kan Bombo Radyo Legazpi na puon sa masunod na semana, magkakaigwa nin El Niño caravan an provincia.
Sa paagi kan programa, mapasiring an mga opisyal kan gobierno provincial sa mga lokal na gobierno, mga komunidad, asin sa mga farm areas ngani na maipaliwanag kun ano an magigin epekto kan super El Niño sa mga parasisira asin mga paraoma.
Digdi man maipapaabot sa mga namamanwaan kun ano an pwedesir na gibuhon durante sa drought condition asin dry spell.
Sa presente pigtatawan muna nin atensyon an pag-adjust kan planting calendar kun sain tatawan prayoridad an mga pananom na pwedesir na mabuhay maski sa panahon kan tagmara.
Tinawan duon kaini na dapat na mas makapag-adaptar an mga paraoma sa panahaon na pinag-aagihan sa ngunyan.
Dagdag pa kan opisyal na pigbabantayan man ngunyan an mga eksistidong dams, mga water supplies asin iba pang pwedesir na maging source nin patubig.
Mientras tanto, sinabi ni Buenconsejo na sa presente nakahanda na man an mga inputs siring kan banhi, mga pataba asin iba pang pwedesir na ipanao sa mga paraoma.
