LEGAZPI CITY- Padagos ngunyan an pagbulos kan pakikidamay sa pamilya kan ginadan na taga media hali sa Masbate na si Joaquin “Dos por dos” Briones Jr.
Kadaklan sa mga ini an nagpahayag nin namamatean na dagit asin kamunduan sa social media.
Napag-araman na si Briones na an ika-tulong mediaman na ginadan sa probinsya kan Masbate puon ki Nelson Nedura na ginadan kan Disyembre 2, 2003 asin si Antonio Castillo kan Hunyo 12, 2009.
Napag-araman na dati na man na nakulong an nasammbitan na biktima huli sa six counts nin libel kan 2000 kun sain nasentensyahan ini nin 12 taon mi anom na bulan na pagkakakulong alagad natawanan nin parole kan 2005.
Sa presente pangapudan kan pamilya kan biktima an hustisya para sa pang-duwang biktima kan media killing sa irarom kan Duterte administration sunod ki Larry Que na ginadan kan nakalihis na taon.
