LEGAZPI CITY – Planong maggastos nin maabot sa P92.23 bilyon an gobyerno para sa konstruksyon kan Sorsogon-Samar bridge.
An Department of Public Works and Highways (DPWH) an nagkrear kan project cost kasabay an saindang kahagadan nin endorsement kan limang taong mega projects hale sa National Economic Development Authority (NEDA) para sa kick-off kan feasibility study.
Segun ki Ernesto Octaviano, pamayo kan NEDA regional office project development investment programming and budgeting division, ikokondusir kan Chinese experts an pag-aadal sa paagi kan funding grants hale sa gobyerno kan China na madurar nin anom na bulan.
Naglalaom man si Octaviano na mapupunuan an konstruksyon sa masunod na taon.
Positibo man an opisyal na kasabay an pondo sa pag-abila kan Chinese government financing susog sa 2016 Philippine-China Development Framework of Cooperation.
Igwang kombinasyon an Sorsogon-Samar bridge project nin labang 25.4 kilometers na kumpwesto nin tulong span bridges – Allen pasiring sa San Antonio sa Northern Samar, San Antonio pasiring sa Capul sa Northern Samar, asin Capul, Northern Samar pasiring sa Matnog, Sorsogon.
Parte an nasambitan na proyekto kan duwang prayoridad sa irarom kan “Nationwide Island Provinces Link Bridges for Sustained Economic Growth Development.”
Piglalaoman man na madara ini nin urog na dakol na economic opportunities sa pagultanan kan Luzon, Visayas, asin Mindanao.
Kan mga nakalihis kayang dekada, pigagamit an roll-on roll-off (RoRo) ferries sa paghatod nin pasahero asin behikulo hale sa manlaen- laen na probinsya sa Visayas asin Mindanao pasiring sa Metro Manila asin iba pang parte kan Luzon.
