LEGAZPI CITY- Wara pa nin klarong rason ngunyan sa pag-arestar sa incumbent municipal councilor asin dating bise-alkalde kan Sto. Domingo, Albay.
Binisto an nasambitan na opisyal na si Edna Banda na pigsasabing dinakop sa paagi kan mandamiento de aresto para sa kasong pagbalgar sa Presidential Decree 1445 o an Government Auditing Code of the Philippines.
Sigon ki PCI Arthur Gomez, tagapagtaram kan Albay PNP, dinara sa istasyon kan pulisya si Banda asin nag-agi sa mga magkakanigong proseso alagad nagkaigwa nin paramientras na libertad makalihis na makapag-pyansa nin P6,000.
Susog sa impormasyon gikan ki PCI Gomez, bako pa klaro kun ano an partikular na ley na binalgar ni Banda sa irarom kan Auditing Code alagad sierto suboot na bako pa tapos an kaso kaini.
Si Banda an dating bise-alkalde kan nasambitan na banwaan na nagsirbe man bilang acting mayor makalihis na maimbwelto sa kontrobersiya dapit sa Legacy scam an nagadan na si ex-mayor Celso de Los Angeles.
