LEGAZPI CITY – Naghagad ngunyan nin dispensa an barangay kapitan kan Baranghawon sa syudad kan Tabaco huli sa isyung pigkakahampang kan saindang lugar.
Ini makalihis i-hold kan bangko an saindang pondo huli sa makadudang pagkawara kan saindang P2.4 milyon na pondo kan 2013-2014 huli suboot sa unauthorized alteration of amount sa mga project proposals na pigpapapirmahan sa barangay kapitan.
Alagad huli na man ta dae pa nin klarong impormasyon an mga residentes sa totoong nangyari, nagkapira sa mga ini an nagtutubod na an kapitan an igwa nin paninimbagan sa problema.
Sa intribista kan Bombo Radyo Legazpi sa sarong residente digdi, napag-araman na bako klaro sainda kun ano an totoong nangyayari sa saindang barangay alagad huruding-huding an dapit sa pending na sweldo kan gabos na opisyales sa laog nin anom na bulan puon kan Setyembre.
Susog man sa pahayag kan sarong barangay kagawad kan Baranghawon, nagtutubod sinda na pineke kan saindang tresyurera an pirma kan kapitan kun kaya maski nagkakantidad sana nin P2,000 an sarong proyekto, nagigin P42,000 na ini.
Napundo man suboot an gabos na transaksyon sa lugar huli sa kawaran nin pondo.
Kontra man ini sa pahayag kan mismong barangay kapitan na si Rene Realizan kun sain sinabi kaini na nagpapadagos an saindang operasyon huli ta sienerto man suboot kan Commission on Audit (COA) na mare-reinburse an kwartang saindang pigagamit sa ngunyan.
Ineksplikar ni Realizan na nagpuon ini kan magpalyar an saindang tresyurera na magsumiter nin financial report sa COA kan taon 2013-2014 kun sain nanotaran na nawawara an P2.4 milyon nindang pondo.
Aminado an opisyal na nagpipirma sya sa mga papel na pigpepresentar kaini alagad pigriribayan suboot kan saindang treasyurera an kantidad kan proyekto.
Nagbabasol man ini ngunyan na nagin kumpyansa syang maray sa nasambitan na opisyal.// Sa ngunyan, pighahalat pa suboot ninda an resulta kan imbestigasyon kan COA.
