LEGAZPI CITY- Pig-oobliga ngunyan an gabos na barangay na magsagibo nin barangay assembly duwang beses lambang taon.
Katakod ini kan kasuguan gikan sa Department of Interior and Local Government (DILG.)
Sigon ki Elmer Villanueva, pamayo kan DILG Legazpi, ipigsasagibo an assembly kada Marso asin Oktubre.
Sa Marso 25 an enot na semester kaini na igwa nin temang “Sulong barangay kontra droga, krimen at katiwalian, makilahok, makialam, makiisa.”
An barangay kaya suboot an enot na dapat na pakusugon sa pakikipaglaban kontra sa mga isyu sa sosyudad arog kan iligal na droga, human trafficking asin child pornography na mawot kan DILG na tukaron sa nasambitan na pagtiripon kan mga opisyales kan barangay.
Dugang pa ni Villanueva, kabale man an Kasambahay Law sa mga dapat na pag-olayan sa enot na semestre.
Digdi na man suboot malaog an State of Barangay Address (SOBA) kun sain ipipresentar kan barangay kapitan an mga akomplisiemyento mantang financial statement man para sa treasurer.
Ipighayag pa kaini na igwa nin magkakanigong disciplinary action an DILG para sa mga barangay na dae makunsudir kan assembly.
Importante kaya suboot na matukar an nasambitan na mga isyu asin maka-comply sa rekisitos kan ahensya.
