LEGAZPI CITY — Tinawanan nin pagmidbid kan Police Regional Office 5 (PRO5) an pitong maiisog na pulis kan Uson, Masbate makalihis kaining maka-engkwentro an mga miyembro kan rebeldeng New People’s Army (NPA) sa Brgy. Badling, Uson, Masbate.
Isinagibo an pagtatao nin Medalya ng Kagalingan sa Sinagtala Hall, Camp Bonny Serrano, Masbate City kun sain mismong si si PRO5 Regional Director PC/Supt. Melvin Ramon Buenafe asin Masbate PNP Director PS/Supt. Froilan Elopre an nag-abot bilang pagmidbid sa kaisogan asin ipinahiling na exemplary conduct sa engkwentro.
Mientrastanto, personal man na binisita sa ospital no Bueanafe an nalugadang pulis sa bakbakan na si PO1 Chileto Amistad na nakaresibe man nin Wounded PNP Personnel Medal asin financial assistance gikan sa direktor asin ki Masbate Governor Antonio Kho.
Katakod na man kan mga pang-aatake kan mga rebelde sa manlaen-laen na parte kan probinsya, isinairarom sa two-day Improvised Explosive Device (IED) Identification and Awareness Course an mga pulis ngani na mapahiwas pa an kaaraman kan mga ini sa posibilidad na huma sa seguridad sa nasasakupan na probinsya.
Magigirumduman na nagbungkaras an nasambitan na bakbakan makalihis na tambangan kan mga pinanunubudang NPA an nasambitan na mga pulis mientras na nagreresponde sa sarong shooting incident.
