LEGAZPI CITY—Gadan an sarong 66-anyos na lalaki makalihis na mabunggo ini nin traysikel sa Barangay Lupi sa banwaan kan Prieto Diaz sa Sorsogon.
Segun ki Police Staff Sergeant Job Reyes, an investigator kan Prieto Diaz Municipal Police Station, sa intrevista kan Bombo Radyo Legazpi, an biktima nabunggo kan sarong top down tricycle mantang naglalakaw ini pauli gikan sa sarong baylihan.
An pagkabunggo sa biktima nagkawsa nin pagkabagok kan saiyang payo rason kun nata binawian ini nin buhay.
Dinara pa sa ospital an biktima alagad dae na ini naisalbar pa.
Mientrastanto, an suspetsado posibleng mahampang sa kasong Reckless Imprudence Resulting in Homicide.
Nagpagirumdom man an opisyal sa mga namamanwaan na pirming mag-ingat lalo na an mga nagbabiyaheng motorista.
