LEGAZPI CITY — Nag-abot na sa haros 50 indibidwal an nadakop kan Smoke-Free Unit kan ciudad kan Legazpi na nagbalgar sa Anti-Smoking Ordinance sa pagpopoon pa sana kan Magayon Festival.
Sa intrevista kan Bombo Radyo Legazpi ki Jaime Olarte, pamayo kan Smoke-Free Unit Legazpi, pinakahuring nadakop an 13 katawo kan nakalihis na aldaw na nagsisigarilyo mantang nag-iinom.
Segun ki Olarte, maski an mga patagong nagtitinda nin sigarilyo sa festival an nadakop naman.
Pasorpresa man suboot na piggigibo an operasyon tangarig madakop sa akto an mga naninigarilyo urog na warang ikinaag na smoking area sa lugar.
Iniheras pa ni Olarte na pigmo-monitor man giraray kan grupo an Legazpi Boulevard, airport site asin an Terminal 2.
