LEGAZPI CITY – Sinangatan na nin kasong pagbayular sa eksistidong protocols asin guidelines kan Inter-Agency Task Force (IATF) kontra COVID-19 an limang persona na nagbalong maglusot pasiring sa provincia kan Catanduanes.
Sa intrevista kan Bombo Radyo Legazpi ki Information Officer Catanduanes Nikko Templonuevo, nadakop kan mga otoridad sa Mayngaway, San Andres an nasabing mga pasahero mientras na lunad kan inarkilang bangka.
Enot digdi, napag-araman na ”denied” an mga s-pass kan mga ini kun kaya dae tinugutan na maglunad nin barko.
Afuera pa digdi, ”unverified” man an covid-19 test results na ipinasa kan limang LSIs.
Nagluluwas na residente kan banwaan kan Viga an apat na biyahero mientras na taga-Caramoran an saro.
Abiso ni Templonueva sa mga LSIs parikular na an hale sa NCR Plus area na dae na magpirit na mag-uli sa Catanduanes kun bako man APOR asin essential travellers huli ta dae man sana papalaogon dara kan nakabanderang polisiya sa provincia.
