LEGAZPI CITY-Naaksidente an sarong motorsiklo huli sa sarong ayam na nagbalyo sa tinampo sa Barangay Salvacion, Pilar Sorsogon.
Segun kay Shift B Substation Team Leader, Fire Officer 3 Bruce Magtarayo kan Bureau of Fire Protection Pilar, sa intrevista kan Bombo Radyo Legazpi, 3 an sakay kan motosiklo, 1 lalaki na 26-anyos asin 2 babae na 19-ayos asin 13-anyos.
Dugang pa kan opisyal, warang kabanggaan an motorsiklo, alagad naresibe ninda na igwang aksidente sa lugar huli sa sarong phone call hale sa sarong concerned citizen.
Tulos man na nagresponde suboot an Bureau of Fire Protection Pilar asin naabutan ninda an 3 biktima na igwa pang malay sa gilid kan tinampo.
Nagsagibo man an nasambitang ahensiya nin first aid, asin pig-check an consciousness asin vital signs kan mga biktima, kung igwang injuries ngani matawanan nin asistensiya.
Sa saidang initial assessment, nagsapo nin mga minor injuries an mga biktima, siring kan lugad tuhod asin braso na tulos man na tinawan nin asistensiyang pang-medikal asin dinara sa hospital.
Pagirumdom kan opisyal na sa mga motorista na magin maingat sa pagmamaneho sa kalsada, asin pirming magsulog nin helmet urog na pag igwang kairibang mga menor de edad sa pagbyahe.
Dagdag pa ni Magtarayo, na sa mga igwang ataman na ayam, huli sa ini an nagkawsa nin aksidente, siertohon na nakagakod an mga ini ngani dai na makaabala sa mga nagbabyahe sa kalsada.
