LEGAZPI CITY – Positibo an resulta kan magkasuway na anti-drug operation na isinagibo kan pinagsarong puersa kan kapulisan sa Albay asin Philippine Drug Enforcement Agency (PDEA).
Sa Brgy. 13, Bacacay, inaprehender si Edwin Belga Sr, 52 na kaibanan sa listahan kan Provincial Priority Database on Illegal Drugs.
Nakumpiskar digdi an limang sachet kan pigtutubudang shabu asin P500 na ginamit na buy-bust money.
Sa Brgy. Sto Cristo sa ciudad kan Tabaco, arestado man si Antonio Butial alyas “Adit”, 38 na kasabay sa Directorate for Intelligence Watchlisted Personality.
Nagresulta pa an operasyon sa pagkaka-recover kan sarong sadit na sachet kan pigtutubudang shabu asin buy-bust money.
Alagad sa isinagibong paghiling sa mga gamit kan suspek, nakua pa sa kolor brown kaining bag an duwang medium-sized sachets na may kaparehong substance, sarong sadit na sachet asin iba pang drug paraphernalia.
Susog sa report kan Albay PoliceProvincial Office, anas nasa kustodiya na kan nakakasakop na hepatura kan pulis an mga ini para sa magkakanigong disposisyon.
