LEGAZPI CITY – Kabali an labi sa 1,000 na miyembro kan Irrigators Association sa mga benepisyaryo kan Tulong Panghanapbuhay sa Displaced at Disadvantaged Worker (TUPAD) sa irarom kan Department of Labor and Employment (DOLE).
Sa intrevista kan Bombo Radyo Legazpi ki Bernadeth Balingasanm, Operation Section Head kan National Irrigation Albay Provincial Office, hali an nasabing mga benepisyaryo sa provincia kan Albay asin Catanduanes.
Prayoridad sa nasabing asentensya an mga paraomang labing naapektaran kan epekto kan El Niño.
Obheto kan nasabing lakdang na matabangan na makabawi o makabangon an mga paraomang nalugi huli sa matinding init kan panahon.
Alagad segun ki Balingasa, dawa papano igwa man giraray nin napakinabangan an mga paraoma sa saindang mga pananom kun sain dae sana nabawi an gastos sa produksyon.
Magigirumduman na kabali an nasabing duwang provincia sa mga nagsapar nin danyos sa agrikultura huli sa epekto kan El Niño.
