LEGAZPI CITY – Nagsakat na sa 1,764 an kabilugang nakumpirmar na kaso kan COVID-19 sa Bicol makalihis an 19 panibagong nadugang na nagpositibo.
Nasa 461 naman an aktibong kaso kan virus sa rehiyon.
Susog sa impormasyon hali sa Department of Health (DOH) Bicol, tulo sa mga ini an hali sa Albay partikular na an duwang hali sa ciudad kan Legazpi asin saro sa ciudad kan Tabaco.
Makalihis man an pirang aldaw na warang bagong kaso, duwa an nagpositibo sa Camarines Norte mantang anom man sa Camarines Sur.
Sa Catanduanes, igwa man na tigsararong bagong kaso an Bato, Pandan asin Viga mantang tulo man sa Virac.
Duwa man an nadugang sa bagong kaso sa Sorsogon kun sain saro sa Juban asin saro sa ciudad kan Sorsogon.
Sa provincia kan Masbate, wara man na nadugang na bagong nagpositibo.
Mantenido man sa 1, 240 an recoveries asin 63 an nagadan huli ta wara man na panibagong numero na nadugang.
