LEGAZPI CITY – Maugmang ipigbareta kan Philippine Drug Enforcement Agency Regional Office 5 (PDEA RO5) an pagkakabuwag kan tulong drug den asin pagkakakarsel kan 18 drug personalities sa isinagibong serye kan anti-illegal drugs operation sa Barangay Peñafrancia Naga City.
Sa isinagibong press conference kan PDEA Bicol, pigsabi ni Regional Director Atty. Jacquelyn De Guzman na uminabot sa poco mas o menos P336,600 na kantidad kan pigtutubudang shabu na nakumpiskar ninda an naisakatupadan huli sa koordinasyon sainda ni Naga City Mayor Leni Robredo asin kan Police Regional Office 5.
Patunay suboot an matrayumpong operasyon sa saindang mahigot na kampanya asin laban kontra ilegal na droga na nagtataong huma sa buhay kan mga residentes huli ta kadaklan sa mga nadakop an imbwelto man sa manlain-laing klase nin krimen sa nasambitang ciudad.
Sa ibong kan mga akomplisyemento an aminado man siya na may kaipuhan pa sindang dumanan na mga lugar na may presensya pa kan mga ilegal na kontrabando mantang nagpapasalamat man siya huli sa magayon na koordinasyon kan mga residentes na dae nagduduwang isip na magsumbong sa saindang ofisina.
Pigtaram pa kan opisyal na malalaoman kan publiko na bako sana ini an enot asin ultimong bes na magsasagibo sinda nin siring kaining operasyon sa manlain-laing parte kan rehiyon alagad isasagibo ninda ini sa magkakasuway na aldaw nganing dae mabasa kan saindang kalaban an saindang masunod na mga hiro.
Ipigheras man niya na nagin padifisilan an paglaog ninda sa lugar na pig-aapod nindang “isla sagrada” huli ta base sa lay-out kan lugar an kadakol an mga pasikot-sikot asin dulagan kan mga drug personalities kun sain an iba sa mga ini an nag-agi sa mga bubong alagad dae suboot nakatakas sa sainda huli ta napalibutan ninda an mga pwedeng lusutan kan mga maporbar na magdulag.
Paglinaw niya man na an iba sa mga nadakop na mga suspetsado an bako residente kan Naga City kundi nagdadayo sana sa isla sagrada nganing maggamit kan ilegal na kontrabando huli sa mga sinalakay na mga kaharongan na piggigibuhan ninda ki pot session.
Pighayag man ni De Guzman na sa presente an mga nadakop na drug personalities an nakatenir na sa saindang custodial center mantang pighahalat an commitment order afuera sa sarong babaeng may edad na an nagpaparahay pa sa hospital makalihis mahulog huli sa pagporbar na magtakas kan isagibo an operasyon.
 is pleased to announce the dismantling of three drug dens and the arrest of 18 drug personalities in a series of anti-illegal drugs operations in Barangay Peñafrancia, Naga City.){kind=link}