LEGAZPI CITY- Nagtutubod an sarong political analyst na dakula an nagin kabawasan kan mga tawo na nagtutubod ki Presidente Rodrigo Duterte huli sa mga polisiya kaini asin sa mga kinaiimbweltuhan na eskandalo.
Partikular na sinabi kaini an pagkakaimbwelto kan pangaran kan presidente sa Davao Death Squad.
Segun ki Professor Alex de Guzman, dakol man giraray an igwang kumpyansa sa presidente alagad kun ngunyan ikokundusir an eleksyon, dae na maabot sa 16 million an mga tawong matao nin boto digdi huli ta garo nagin alternatibong opsyon man sana siya kan mga tawo durante kan kampanya maski pa wara man ini nin kongkretong plano para sa nasyon.
Dugang pa ni de Guzman, saro pa sa nakaapektar sa pagkawara kan kumpyansa kan mag tawo iyo an kampanya kontra iligal na droga kun sain nadisganar an mga namamanwa huli sa dae nangyayaring promesa kaini maski sya an mismong nagtalaan kan deadline.
Huli digdi, ngunyan pa sana kinakaipuhan na suboot na maggibo nin lakdang ngani na masustineran an poder huli ta kun dae, mawawaraan nin gana an mga tawo.
