LEGAZPI CITY – Pwedesir makinabang an mga residente kan Barangay Malobago, Daraga, Albay enkaso ma-otob na an plano kan Lokal na Gobierno na gibuhong water source an 3 water spring na yaon sa saindang lugar.
Segun ki Punong Barangay William Marbella sa intrevista kan Bombo Radyo Legazpi hihilingon ninda ini bilang honra huli ta saro an saindang Barangay na makakapagtao nin supply nin tubig bako sana sa saindang mga residentes kundi magin sa enterong banwaan.
Alagad paglilinaw niya man na isasairarom pa ini kan Department of Agriculture sa validation nganing maaraman kun kaya kan mga ini na masustenir an supply kan tubig na kukuwaon.
Basado man sa saindang pagkakarkulo an maabot sa 150 kaharongan sa saindang Barangay an makikinabang sa oras na magibo nang water source an tulo nindang water spring.
Pigdugang man kan opisyal na enkasong dae makapasar an mga water spring sa validation kan Department of Agriculture, pwedesir sindang maggibo nin bubon nganing magserbing water source.
Kahagadan niya man sa Lokal na Gobierno na sa oras na maisakatupdan na an plano na i-libre na an saiyang mga residente sa pagbabayad sa konsumo nin tubig.
Nagmamawot man si Marbella na warang magigin maraot na epekto sa sainda asin sa kapalibutan sa oras na gibuhon na an planong patubig para sa saiyang mga residente asin sa kataraid nindang Barangay.
