LEGAZPI CITY-Naglangkaw nin P85 an aldawang sahod kan mga minimum wage earners sa Metro Manila makalihis na aprubahan an panibagong wage hike para sa National Capital Region (NCR).
Inanunsyo ini ni Labor Secretary Francis Tolentino ngonian na aldaw nin Martes an pagtaas kan sahod, na suboot sarong makasaysayang lakbang para sa mga obrero.
Huli digdi, maabot na sa P780 kada aldaw an minimum wage kan mga empleyado sa non-agriculture sector sa NCR.
An bagong dagdag-sahod kasunod kan P50 wage increase na ipinaotob kan Hulyo 2025 asin resulta kan mga petisyon asin pangapudan kan manlain-lain na labor groups na langkawan an sahod ngani matugunan an epekto kan inflation asin padagos na paglangkaw kan presyo kan mga pangenot na barakalon.
Segun sa Department of Labor and Employment (DOLE), pigkakarkulong nasa 1.1 milyong minimum wage earners sa Metro Manila an makikinabang sa wage adjustment.
Alagad, dai pa piga-anunsyo kan ahensya kun nuarin ini magigin opisyal asin epektibo.
Mientras tanto, ikinaogma ini kan mga labor organization, kaiba an Trade Union Congress of the Philippines (TUCP), asin sinabing bako pa ini bastante ngani matugunan an pigkakarkulong family living wage.
Padagos man na pigbubusol kan mga grupo nin obrero an pagrepaso sa presenteng regional wage-setting system.
Sinabi pa kaini na kaipuhan nin sarong pamilya na igwang limang miembros nin dai mababa sa P1,266 kada aldaw ngani matustusan an mga pangenot na pangangaipo.
