LEGAZPI CITY- Pormal nang binuksan kan Donsol Municipal Tourism Office sa Sorsogon an whaleshark season o dagsa kan mga butanding sa kadagatang sakop.
Sa intrevista kan Bombo Radyo Legazpi ki Donsol Tourism Officer Desiree Abitrea, naggagayon na suboot an “sightings” an mga gentle mammals kaya binuksan na kan Disyembre 18 sa paagi nin Thanksgiving Mass, flower offering asin light and fire offering.
Mas amay man na nahiling an enot na butanding na nagbisita kan Nobyembre 9 asin nagdadakol na sa kada aldaw.
Abiso man ni Abitrea sa mga mabisitang turista na mas magayon magduman kun hapon tangarig makasabay sa aktibidad an firefly watching and river cruise sa banggi asin whaleshark interaction sa aga.
Piglalaomang hasta sa Mayo mahihiling sa lugar an mga nasabing butanding kun sain nasa Abril an pinakadakol na bulos kan mga nagbibisita mantang pigtutugutan man an hasta 30 baruto na sabay-sabay na magdalan lunad an anom na pasahero.
Kasabay kan pagbisita, ipinagirumdom man kan opisyal an nagkapirang guidelines tangarig na maprotehiran an mga marine wild animals siring kan pagbabawal sa pagpicture na may flash asin paglangoy sa distansyang tulong metro an rayo sa lawas asin 4 metros man an rayo sa ikog.
Babantayan man an mga ini kan Butanding Interaction Officer tangarig na masierto na nasusunod an regulaciones na ipig-iimplementar.
Afuera sa atraksyon sa Butanding asin firefly watching sa salog, nag-iisip naman an lokal na gobierno kan iba pang tourism-related activities na pwede pangmai-ofrecir kan Donsol.
