LEGAZPI CITY – Inanunsyar kan Commission on Election Albay na mabukas na liwat an saindang voters registration para sa November 2, 2026 Sangguniang Kabataan Elections.
Segun ki Comelec Albay Provincial Election Supervisor Atty. Maria Aurea Bo-Bunao sa intrevista kan Bombo Radyo Legazpi na poon sa maabot na lunes Oktubre 20 sagkod Mayo 18 sa masunod na taon an registration na pwedesir aprobitsaran kan mga dae nakapagparehistro kan nakaaging bulan kan Agosto.
Sakop suboot sa nasabing aktibidad an mga bagong botante, reactivation kan dating record, pagpapabago kan detalyes asin pagpapalipat nin lugar kan mga botante.
Pwedesir man suboot magsumiter nin aplikasyon an siisay man sa mga ofisina kan Comelec sa kada ciudad o munisipyo huli ta bukas sinda kada Lunes sagkod Sabado afuera sa mga regular holiday asin mapoon nin alas otso nin pagka-aga sagkod alas singko nin pagkahapon.
Pigtaram pa kan opisyal na ginibo kan komisyon an halawig na durasyon kan pagpaparehistro nganing maibitaran an kalimitang piggigibo kan publiko na nagruruso sa saindang ofisina tuyong ultimong aldaw kan registration.
Afuera sa registration form an kaipuhan man suboot an arin man na klase nin valid ID arug kan Driver’s License, Student ID, National ID, Postal ID, iba pang government-issued ID na nagpapatunay na residente ka sa sarong barangay.
Piglinaw niya man na pwedesir nang magparehistro ngonian an sarong joven na ma-kinse anyos antes magsapit an aldaw kan pirilian sa November 2, 2026.
Pagdoon ni Bo-Bunao na sa ibong kan mga nangyayari sa Pilipinas, may tyansa pa an publiko na mabago ini sa paagi kan pagpaparehistro asin pagpili nin tamang lideres na may dignidad kun importante an pag-aprobitsar kan publiko sa mga voters registration.
