LEGAZPI CITY-Sinangat na kan US Senate an funding bill para mawakasan na an pag-shutdown kan gobierno sa laog kan pirang aldaw.
Kairiba an walong Democrats asin mga Republican sa mga nag-boto para mawakasan na an pagsasarado kan gobierno.
Sa pinal na bersiyon kan propwesto, pinalawig kaini an government funding hasta sa Enero kan masunod na taon.
Kaiba digdi an tulong taon na funding bills para sa manlain-lain na federal agencies, mga programa asin an pagbabalik kam federal workers na hinale sa katahawan kan shutdown.
Kapalit man kan pagpabor kan walong Democrats, nagtugot an Republicans na magbotohan sa katahawan kan Disyembre katakod kan pagpapalawig pa kan health care tax credits.
Nangangaipohan pa nin approval an nasabing propwesto hale sa US House of Representatives asin kaipuhan pa nin pirma ni US Pres. Donald Trump bago matapos an shutdown.
Uminabot sa 41 aldaw poon kan magsarado an gobierno kan Amerika, na pigkokonsiderang pinakahalabang suspensyon sa historya kan Estados Unidos asin nagresulta sa 1.4 milyong federal employees na warang paid leave o nagtratrabaho nin warang sahod.
Nagresulta man ini nin problema sa mga paliparan sa US kun sain labi sa 7,000 flights an naantala asin 2,000 flights an nakansela huli sa kakulangan kan mga staff.
Enot naman na pig-demand ni Trump sa air traffic controllers na dai nabayadan sa katahawan kan shutdown, na magbalik na sa trabaho asin nagpatanid siya para sa mga dai nagsusunod sa nasabing kasuguan.
