LEGAZPI CITY — (UPDATE) Isinairarom na ngunyan sa imbestigasyon an bangkay kan sarong babayi na nakua sa laog kan lodging house sa Brgy. Dunao, Ligao City.
Enot kaini, ipinaabot kan sarong security guard an nasambitan na impormasyon makalihis na madiskubre an bangkay sa saro sa mga comfort room sa lugar.
Base sa inisyal na impormasyon gikan ki PCI Arthur Gomez, tagapagtaram kan Albay PNP, 15-anyos an daragita na estudyante kan Barayong National High School asin residente kan Barangay Nasisi sa parehong syudad.
Nakatukaw suboot ini sa bowl kan mahiling asin igwa nin nakabusal sa ngimot mientras na nakasulot nin kolor itom asin orange na PE uniform alagad nakababa an sulot na leggings.
Nadiskubre man suboot kan Ligao City Police an pregnancy test sa kwarto kun kaya duda an mga otoridad na bados an biktima asin igwa na nin agom an suspek.
Pighahanap na kan nasambitan na pulisya an lalaking huring nakaibanan kaini sa paglaog sa nasambitan na lugar.
Mientrastanto, liwat na nagpagirumdom si PCI Gomez sa mga inn o lodging house na ipinagbabawal sa ley an pagpapalaog sa mga menor de edad sa mga siring na establisimiento.
Sa ngunyan, isasairarom sa otopsiya an hawak kan biktima ngani na maaraman kun igwa nin laog an tulak kaini.
