LEGAZPI CITY-Pigbabantayan kan state weather bureau an bagyong ‘Bavi’ na nasa luwas pa kan Philippine Area of Responsibility (PAR) ngonian na aldaw nin Biyernes, Hulyo 3, 2026.
Susog sa report, huring nahiling an bagyo sa rayong 3,190 kilometro sa sirangan kan Eastern Visayas.
Dara kaini an kusog kan paros na nag aabot sa 150 kilometro kada oras harani sa sentro asin igwang pagbugso na hasta 185 kilometro kada oras.
Naghihiro ini pa-kanluran sa rikas na 20 kilometro kada oras.
Mantang wara pang direktang epekto ini sa nacion, padagos na mino-monitor kan mga eksperto an paghiro kan bagyo huli ta posible ining makaapektar sa kondisyon kan panahon sa mga masunod na aldaw kun maglaog na sa PAR.
Enkaso nasa Philippine territory na ini, aapodon ining bagyong Inday.
Nagpatanid man an mga eksperto sa publiko na magtenir na nakaantabay sa mga opisyal na abiso asin dae basta-basta magtubod sa mga bako beripikadong impormasyon.
