LEGAZPI CITY- Pigheras kan Civil Service Commission Bicol na naging matrayumpo an ipigsagibong Career Service Examination Pen and Paper Test kan nakalihis na domingo, Agosto 11.
Segun kay Atty Daisy Punzalan Bragais an Civil Service Commission Bicol Regional Director sa naging intrevista kan Bombo radyo Legazpi, wara suboot nairehistrong untoward incidents sa nasabing eksaminasyon.
Nasa 93% suboot an naging turn out kan mga examinees sa Bicol kun saen sa kabilugan na 14,500 na mga nag apply para sa eksaminasyon, 983 digdi an absent asin dae nakapag exam.
Alagad segun sa opisyal na dae na ninda kontrolado an mga dae nakapag exam kaya dae ninda maisihan kun ano an rason kun niata dae sinda nakaduman sa mismong aldaw kan eksaminasyon.
Mientrastanto, forfeited naman mga ibinayad kan mga dae nakapag exam huli ta nagamit na ini kan ahensya sa pagproseso kan nasabing eksaminasyon asin ibinayad naman sa mga examinators asin iba pang pangangaipo.
Nagpasalamat man ini sa gabos na nagsirbi kan eksaminasyon.
Nakatalaan man na ipaluwas kan ahensiya an resulta kan eksaminasyon sa Oktobre 27 sa presenteng taon.
