LEGAZPI CITY- Kulong an tulong drug personality makalihis na maarestar sa magkakasuway na operasyon kan mga otoridad sa probinsya kan Sorsogon.
Enot kaini, naarestar sa Brgy. Binanuahan, Pilar, Sorsogon an suspek na si Ricardo Nuñez makalihis na ikasa an operasyon kan mga personahes kan Pilar Municipal Police.
Narekober digdi an tulong sachet nin pinagtutubudan na shabu asin P500 na buy bust money.
Sa suway na operasyon na ikinasa kan pinagsarong pwersa kan Bulan Municipal Police, Sorsogon Provincial Public Safety Company, Criminal Investigation and Detection Team, Philippine Drug Enforcement Agency, Police Intelligence Branch asin Regional Public Safety Batallion, naarestar man an sarong barangay tanod na si Dennis Oberos.
Nakumpiskar ki Oberos an siyam na sachet nin pinagtutubudan na shabu.
Mientrastanto, wara man na dulag si Fanny Pagaduan makalihis na masakote kan pwersa kan Magallanes Municipal Police, Sta. Magdalena Municipal Police, Sorsogon Criminal Investigation and Detection Team, asin 3rd Maneuver Company sa ikinasa kaining operasyon.
Narekober man sa suspek an tulong sachet na pinagtutubudan na shabu asin P500 na buy bust money.
Sa presente pighahanda na an kasong isasangat kontra sa mga suspetsado huli sa pagbayolar sa Republic Act 9165 o Comprehensive Dangerous Drugs Act of 2002.
