Ipigdoon liwat ni U.S. President Donald Trump na an pagsakop sa Greenland an pwedesir makatabang sa Estados Unidos nganing mabawasan an pagdepende kaini sa China para sa mga critical minerals, partikular an rare earth elements.
Sa ibong yan kan matinding problema sa geology kan Isla arug kan kakulangan sa imprastraktura.
Magigirumduman na wara pang maski sarong minahan kan rare earth na aktibong nagpapadalagan sa Greenland, rason nganing kuwestiyunon kan mga eksperto an pagigin gahaman kan Amerika.
Magigirumduman na enot nang ipinahayag ni Trump an prayoridad kaini na maghanap nin rare earths sa Arctic island kapag napasakamot ninda ini kawsa kan paghihigpit kan China sa pag-export kan mga critical minerals sa U.S. kasunod kan mga serye kan pagpataw kan taripa ni Trump sa nacion.
Sa ibong kan nag-alokar na an administrasyon kan ginatos na milyong dolyar para sa pagmimina sa laog asin luwas kan nacion, binuhay niya liwat an ideya kan pagkuha sa Greenland hale sa Denmark bilang panghaluyang solusyon sa problema kan Amerika.
Alagad segun mga geology expert, pwedesir suboot abuton nin kadakol na taon o dekada antes makapagprodyus kan rare earths an Greenland, asin posible man suboot na dae ini mapakinabangan sa komersyal.
Napag-araman na pigkakarkulong may poco mas o menos 1.5 milyong tonelada kan rare earths an isla, alagad kadaklan sa mga proyekto an nasa exploratory stage pa sana.
Afuera digdi an mapapagalan man suboot an Estados Unidos sa planong magtindog nin mga mina huli ta an Greenland an naghahampang sa kakulangan kan mahiwasang konstruksyon arug kan tinampo, pantalan, planta kan kuryente, asin pabahay para sa mga bihasang obrero arug kan mga minero.
May kaakibat mang peligro sa kapalibutan an pagmimina kan rare earths huli ta naggagamit ini kan mga nakalalasong kemikal asin kalimitang may kaibang radioactive uranium na sarong seryosong angat para sa manipis na Arctic ecosystem kan Greenland.
Dagdag pa digdi, an rare earths kan Greenland an nasa eudialyte rock, sarong klase nin gapo.
Kadaklan kaya kan rare earths sa kinaban an nagpopoon sa carbonatite deposits kun saen igwa nang epektibong teknolohiya para sa pagkuwa kaini.
Sa ibong kan mga angat, padagos an interes kan mga gustong mamuhunan sa plano ni Trump, kun saen nagdoble an stock kan Critical Metals ngonian na semana makalihis ipahayag kan Amerika an plano para sa pilot plant sa Greenland, sa ibong kakaipuhanon pa man kan ginatos na milyong dolyar antes makapagtindog nin aktwal na minahan.
