LEGAZPI CITY-Piglalaoman kan sarong transport group sa Sorsogon na makakatabang an deklarasyon kan state of calamity sa mga driver sa provincia.
Segun ki SORINTRAFED President Ramon Dealca, sa intrevista kan Bombo Radyo Legazpi na magayon ining lakdang ngani makatabang sa dalagan kan transportasyon sa padagos na paglangkaw kan presyo kan produktong petrolyo.
Alagad laoman ninda na kaskasan an pagpapaotob kaini ngani matabangan an mga nasa hanay kan transportasyon siring man an gabos na apektado.
Nanotaran man kan grupo na sarong gasolinahan an nagsarado na sa provincia huli suboot sa kawaran nin suplay mantang nagpakol na sa P123 kada litro an Diesel asin P92.50 naman an presyo kan gasolina.
Dagdag pa ni Dealca na kun magpadagos pa ini, posibleng madagdagan an mga gasolinahan na masarado.
Sa presente, kahagadan kan grupo an makaskas na pagpapaotob kan state of calamity huli ta dehado na an mga driver asin kadaklan sa sainda, warang ibang trabaho asin ikakagutom ini kan saindang mga pamilya.
