LEGAZPI CITY – Dismayado an grupo kan mga nasa sector nin transportasyon sa rehiyon kan Bicol sa programang inaprobaran kan presidente sa tahaw kan krisis sa gasolina asin an primerong kadikit na rollback sa presyo kaini sa masunod na semana.
Magigirumduman kaya na basado sa resulta kan Mean of Platts Singapore (MOPS) trading, pigkakarkulong nasa P8.80 hasta P10.80 kada litro an magiging tapyas sa diesel mantang an gasolina man an posibleng umabot hasta sa P1.50 kada litro an tapyas.
Segun ki Condor Piston Bicol President Ramon Rescovilla sa intrevista kan Bombo Radyo Legazpi na dae ninda mamamatean an nasabing rollback urog pang labi sa doble na an itinaas sa kada litro kan petrolyo sa nakalihis na mga semana.
Magtetenir man suboot na magabat sa bulsa asin halangkaw an presyo kan diesel asin madepende pa an pagbabago sa presyo kaini sa mga gasolinahan urog nang dae man ini nare-regulate kan Department of Energy.
Aminado man siya na pira sa saiyang pag-iribang mga driver an paramientras na munang nagpundo sa pamamasada huli sa halangkaw na presyo kan produktong petrolyo na nagkawsa sa pagdakol kan mga commuters sa mga kakalsadahan na resulta kan pagigin buta kan gobierno sa tunay na problema kan saindang sektor.
Nagpapasalamat man an opisyal sa mga commuter asin ordinaryong namamanwaan huli sa pagtatao sa sainda nin kadikit na tabang nganing makaraos sinda sa pang-urualdaw sa ibong kan apektado man sinda kan pagtaas sa presyo kan mga babarakalon asin hababang sahod.
Patanid man ni Rescovilla na pwedesir na magkondusir sinda liwat nin tigil pasada enkaso wara pa sindang mareresibing ayuda o subsidiya gikan sa gobierno pagsapit kan Abril 15.
