LEGAZPI CITY – Nagtaong patanid an Toxic watchdog group sa mga konsyumer mapadapit sa mga kontaminadong school supplies ngonian na paparani na an balik eskwela.
Segun ki BAN Toxics Campaigner Thony Dizon sa intrevista kan Bombo Radyo Legazpi na nagpoon na kan nakalihis na semana an saindang monitoring sa mga pigpapabakal na mga school supplies sa pirang parte kan nacion.
Kapansin pansin suboot sa saindang monitoring na kulang an impormasyon na nakabugtak sa mga school supplies na saindang pigtitienda.
Sa mga masunod na aldaw an ipapaluwas na ninda an resulta kan isinagibong test-buy nganing matawan pa nin impormasyon an mga konsyumer mapadapit sa mga kagamitan na may maraot na kemikal.
Pigtaram pa kaini na kaipuhan na magin rigmat kan publiko asin dae basta basta magpadara sa hibabang presyo na pig-oofersir alagad may kaibang toxic chemicals na peligroso para sa salud kan mga estudyante.
Saro suboot sa palatandaan na may halong maraot na kemikal an mga kagamitan iyo an kun makukulay an mga ini kan mga ini alagad nagigin magayon ini sa mata kan mga jovenes.
Nangapodan siya sa Department of Trade and Industry asin Food and Drug Administration na ma-regulate an mga school supply nganing masawata an paglakop kan mga gamit na kulang sa papeles asin product information.
Suhestyon man ni Dizon na magbakal sa mga mapagkakatiwalaan na mga tiendahan nganing masyerto an kalidad kan mga gamit asin an salud kan mga estudyante mantang isipon suboot an kaligtasan kaysa sa pagtitipid.
