LEGAZPI CITY-Pig-eestimar na mas kadakol na basura an winalat kan selebrasyon kan Bagong Taon sa nacion kumpara kan nakalihis na taon segun sa sarong Toxic watchdog group.
Segun kay Ban Toxic Campaigner Thony Dizon sa intrevista kan Bombo Radyo Legazpi na sa saindang paglibot sa nagkapirang lugar, tuminambad an manlain-lain na basura hale sa mga paputok, mga tadang pagkakan, plastic bags, wrapper, asin iba pa.
Pigrekomenda man si Dizon an hiwalay na pagkolekta kan mga basurang ini huli sa posibleng peligro kaini sa mga indibidwal.
Dugang pa niya na dapat magkaigwa nin kampanya kun papano maibitaran an paggamit nin disposals siring kan mga plastic huli ta saro ini sa pigkokonsiderang pinakadakol na basura sa nacion.
Mas marhay suboot na pagolayan ini ngani magkaigwa nin magkakanigong lakdang, pagpaplano asin ngani masabutan an importansya kan pag-segregate kan mga basura.
Dagdag pa niya na importante man an partisipasyon kan komunidad orog na kan mga opisyal huli sa sinda an nag-implementar kan RA 9003 o an Ecological Solid Waste Management Act.
Kasabay kaini, pagirumdom kan opisyal na kaipuhan na maukudan kan mga kababayan an pagigin masinop orog pang ngonian na aldaw, petsa 1 kan Enero 2026, an pagpoon kan “Zero Waste Month”.
