LEGAZPI CITY – Gadan an tolong katawo sa nangyaring banggaan nin kotse asin SUV sa kahalabaan kan tinampo sa Barangay Milagrosa , Castilla , Sorsogon.
Sa intrevista kan Bombo Radyo Legazpi kay PCapt. Jeronie Fartingca an hepe kan Castilla Municipal Police Station, binisto an mga biktima na si Melvin Valenzon Dolot an nagmamaneho kan puting kotse, asin mga pasahero na sinda Ma. Theresa D Peterson, asin Jeriel Mirandilla.
Base sa imbestigasyon kan mga otoridad, nagluluwas na makaskas an pagpapadalagan kan biktima sa pigmamanehong kotse na nag-overtake muna sa pigsusundan na truck.
Alagad huli sa mahalnas na tinampo dara kan pag-uran asin rikas kan dalagan kan sakayan, nawaran nin kontrol an biktima kung kaya nagbirik an kotse asin nag-u-turn sa ibong na linya.
Sakto man na papaabot an sarong SUV na pinagmamaneho ni Jonathan Samsom Peralta kung kaya nabangga kaini an likudang parte kan sakayan kan mga biktima.
Sa kusog kan pagkakabangga, nayupi an likudang parte kan puting kotse asin nagsapar nin mga lugad sa hawak an tolong lunad kaini na binalo pa man na idalagan sa ospital alagad ideneklarar ng dead on arrival.
Lugadan man an drayber kan saro pang sakayan na si Peralta na nakaconfine pa sa ngunyan sa ospital.
Sa ngunyan padagos pa an pinagsasagibong imbestigasyon kan mga otoridad sa insidente.
